1 Thessalonians 5

1Aɓeye vinya ɓei zhin n knisayi a? Kwo to zhin tilas nu ma da ɓeho tu n kwo tukwon, omi-zaje. 2Gama fye kpelo sarai, nge zaho-zahoi ta kpeye lon, Dagayi nyipyei ɓei ɓe n tna esa dnai nu, ngye evi n sukwoyi. 3Sanu n aza ɓei ci nge, “Lafiya lo sarai nyaho to wunya lon bugba fulo.” Nsa gmanyi yi wahala ɓa ɓeɓa tukwo, shi kagna zhin kwa ɓe nyikwoza aba to woi dna ce nyin. Aza deye to ɓei bwa asibui ban, gama abwi-ba to lo n.

4Ama emi aza je, fye to filo n wyegma n na aɓeye tukwon, Dagayi nyipyeyi to ɓei ɓe efye aba ngye evin. 5Gama fye zhin abuzangna ɓinu anyipyeyi aɓi njesun fye to zhin wyegma nyanu kwo sukwo nyan. 6Ntucenu fye ku zhi fya pmi, fyeto wangye n gye azajen. Fye pmi owo zhi-zhi fya ku awye shi. 7Sukwo zhin gyewan sanu, n esai n aza sin eje, kwo zhin ɓa. 8Ama eyi n yi fi n buzangna nyi, yiku hankali bwa, n gu-gui n gaiciya ga yi, n ye-ye yi, ya kun kata eyi gni-gni nya.

9Gama Shekwoyi to kni yi wa zewo minagyi yakpe yi nun, ama wa gni yi dna n eyi Dagayi Yesu Kristi. 10Wafi ntu nyi ɓo n na bai ya sase nwoi nyalo nyalo. Kwo yi kufi, kwo yi-i ye n wye-wyeyi, esa n wo ɓei jeze ɓe n cei. 11Ntu cenu fye ga aje bugba kala, fye mi aje zhin shi fye shin zhin lo nyi.

A wyidna N Na Ɓo Pa Yi

12Omi azaje, fye ga efye ikklisiya tukwoda mwa-mwa, nɓa zhin tnu-tnu n kalayi n fye aba nyi, ɓai daɓo n fyei tu na aɓo tukwo n ɓato bmiya lo nyin. 13Fye gaɓa mwa-mwa fya ye ɓa nfye abugbai vinya ntuge ɓa bmafyenu zhin. Fye pa to fya wu anya n na jeyin.

14Omi azaje, fye gnakni aza n ɓa wo bwato, fye fu aza bugba n ɓa bugba la wunya, Fya zhin aza atna nɓa to n kalai lon, fya zhin hakuri n na azai vinya. 15Fye to ye nge oza wo gba ɓenukwoyi ta n ɓenukwoyi yin, ama fye zhin atna fya zhin aje ɓemana, n na azaje vinya. 16Fye dagma cici. 17Fye zhin aduwa cici. 18Ɓeho-ɓehoi n kwa bwa fye, fye zhin Shekwoyi godiya, gama Shekwoyi nufi nyi n fye aba, n fye zhin Kristi Yesu nya nyi.

19Fye to wo Zafun Gyi-gyi-yi tnu-tnu ɓi nfye abugba min. 20Fye to ci aza wyegba n ɓa wu nyanyin 21ama fye mwi ɓelo-ɓehoi n na da, fya kpe kwo gaiciya nu, ndei kwo zhin gaiciya nu fya gwo kwo. 22Fye bui ɓenukwoyi doho-dohoi si. 23Fa Shekwoyi bugbafu nya n wohin tukwo wa ze fye agyi-gyi-yi. Fa efye zafun, wye-wyeyi, n nayi ɓa bwa kala n tna laifi, har ewyi n eyi Dagayi Yesu Kristi ɓei jezeɓe n cei. 24Shekowyi n wa yi fye fya ze owo aɓi nyi, wo ɓa zhin fye aɓeye vinya shi wo ɓei zhin fye alkawali. 25Omi azaje fye zhin aduwa ntu yi ɓo. 26Fye dna abwa do gami n na a Yesu-viyi ajeyi n ɓo. 27Mi gna fye, dna n Dagayi eye fye ba wasikaye ga a Yesu-viyi vinya. 28Anabarka dnagmayi n ɓa kun n eyi Dagayi Yesu Kristi aba nyi, ɓa kusun n zaho-zahoi n fye mi.